เข้าระบบ

ชื่อผู้ใช้

รหัสผ่าน

  ล ง ท ะ เ บี ย น  

thejeekung

thejeekung的บล๊อก

thejeekung的主頁 | ดูทั้งหมด

ค่าวฮ่ำกำฮัก 3

2009-08-19 22:08
 
 
 
 
ค่าวฮ่ำกำฮัก 3



เดิกสงัด อึดอัดใจ๋นี้ ง่อมอยู่ตี้หนี้ บ่มีไผสน
ขอเขียนค่าวไว้ ยามใจ๋อับจ๋น เหมือนสายลมวน หมองมนหม่นเศร้า
ยามตี้โศก๋า น้ำต๋าหล่อเบ้า เรื่องฮักของเฮา ม่อนน้อย
จีวิตขัดสน ของคนต่ำก๊อย เกิดมาต่ำต้อย เตียวดิน
อยากมีคนฮัก สมัครใจ๋จิ๋นต์ หวังเทพองค์อินทร์ อิ่นดูม่อนข้า
จะอยู่ตี้ไหน ง่อมใจ๋ดั่งบ้า บ่มีไผมา ฮ่วมซ้อน
ง่อมในใจ๋ ดวงทัยสะต๊อน บ่มีคู่อ้อน นอนอิง
หนาวในใจ๋นี้ บ่มีไฟผิง บ่เหมือนเย็นคิง หิงไฟห่มผ้า
หนาวในใจ๋ ดวงทัยดั่งบ้า บ่มีไผมา ฮ่วมคิด
ได้แค่ฝัน จักหันมิ่งมิตร เป๋นคู่ชีวิต เตียวตาง
ไผสักคนนั้น ฮักมั่นบ่จ๋าง บ่ล่อลวงพราง หื้อหมางหม่นเศร้า


จ๋นวันนึ่งหนา ได้มาปะเจ้า สรี๋นงเลา สาวน้อย
พี่ก่อดีใจ๋ ดวงทัยจื้นจ๊อย สุขใจ๋บ่หน้อย นอนาย
คงแม่นคนนี้ ตี้ฟ้าหมั้นหมาย มาเป๋นคู่จาย หื้อหายหม่นเศร้า
ฟ้าคงส่งตั๋ว สายบัวน้องเหน้า มาเป๋นคู่เฮา แน่แต๊
หักห้ามใจ๋ เอาไว้บ่แป๊ บ่กึ๊ดใจ๋แก้ ดวงทัย
ทุ่มเทฮัก ตี้หนักในใจ๋ ปั๋นหื้อนงวัย ไปจ๋นหมดเสี้ยง
สาวหน้าใส แม่ใบหน้าเกลี้ยง ฟู่จ๋าสำเนียง ม่วนล้ำ


ฮักแต๊ๆ หนอ บ่เผื่อใจ๋จ๊ำ เหมือนล่นในถ้ำ วังวน
ยิ่งคบยิ่งฮัก ยิ่งหนักใจ๋ต๋น ยิ่งเมาหน้ามน จ๋นเกิ๋นจักห้าม
ขี่เฮือน้ำไหล หวังได้ล่วงข้าม ต๋ามสายธารา ฝั่งป๊น
แต่ต้องโศก๋า น้ำต๋าเอ่อล้น เฮือพี่บ่ป้น หนตาง
วันตี้น้องฮัก มาหักใจ๋จ๋าง บอกว่าใจ๋นาง บ่หวังใฝ่เฝ้า
ตี้เกยฟู่จ๋า เมินมากับเจ้า เป๋นพี่น้องเฮา เต้านั้น
บ่ได้คบหา มาเป๋นคู่จั๊น บ่ได้หมายหมั้น ดวงทัย
น้องบอกอย่างนี้ พี่ก่อเข้าใจ๋ อดฝืนทนไป บ่ได้โขดเจ้า
สุดแต่หัวใจ๋ ของนายน้องเหน้า ตัดสินใจ๋เอา เต๊อะน้อง
ต๋ามใจ๋เต๊อะหนอ บ่ขอเรียกร้อง อี่นายบ่ต้อง กั๋งวล
ฮักของพี่นี้ ตี้มันอับจ๋น ขอน้องหน้ามน อย่าสนเลยเจ้า
 
 
หื้อทำต๋ามใจ๋ ของนายน้องเหน้า ต๋ามใจ๋นงเลา เต๊อะไท้
เก็บกำโศก๋า ของข้าเอาไว้ หื้ออยู่ตี้อ้าย คนเดียว
ถ้าน้องบ่ฮัก อย่าตั๊กอย่าเหลียว ปล่อยหื้อพี่เตียว คนเดียวเดี่ยวดั้น
ปล่อยหัวใจ๋ พี่ไว้ตี้หั้น อย่าสนใจ๋มัน เน่อไท้
หลอนพี่สับสน จักทนเอาไว้ จักฝืนหื้อได้ นอนาง
ขอหื้อนาฏน้อง อย่าข้องหมองหมาง จุ่งไปต๋ามตาง ใสสว่างบ่เศร้า
จ้างมันเต๊อะหนา โนจาน้องเจ้า เรื่องฮักของเฮา เก่านั้น
ขอหื้อสุขสม อารมณ์น้องจั๊น ต๋ามตี้หมายมั่น ดวงทัย
ฮักของพี่นี้ มีแค่หัวใจ๋ ต้อยต่ำเกิ๋นไป ไผบ่อวดอ้าง


ถ้าน้องมีไผ คนไดแนบข้าง หื้อสุขใจ๋นาง นิ่มน้อย
ขอหื้อสุขี มั่งมีจื้นจ๊อย อย่าตกต่ำต้อย แลนา
กลอนวาตา ขอจบเต้าอี้ เต้านี้วาดวางลง ก่อนแลนายเหย



เดอะจิ๊กุ่ง

14/7/2552 2.00 น
 
.

---------------------------------------------------------

โครงก๋ารเผยแพร่ค่าวในรูปแบบซีดี

http://www.teeneelanna.com/moojoomhao/home/space.php?uid=1&do=blog&id=236

แชร์ 2703 ดู | 0 ความเห็น

Footprints

ความเห็น