เข้าระบบ

ชื่อผู้ใช้

รหัสผ่าน

  ล ง ท ะ เ บี ย น  

thejeekung

thejeekung的บล๊อก

thejeekung的主頁 | ดูทั้งหมด

ค่าวฮ่ำกำฮัก 4

2009-08-19 22:09
 
 

 

 

 

ค่าวฮ่ำกำฮัก 4

 

 

 

กล๋อนกำจ๋า                  ส่งมาแหมครั้ง             ใจ๋พี่บ่ตั้ง                      ฟั่งเขียนมาหา

อยากอู้กับน้อง             แต่ต้องโศก๋า                จึ่งขอเขียนมา               ฟู่จ๋ากับเจ้า

กำค่าวนี้หนา               โนจาน้องเหน้า             ไจ้แค่เขียนเอา              เต้านั้น

พี่กึ๊ดเติงหา                  จั๋นตาน้องจั๊น               จึ่งเขียนมาหั้น              นอนาย

กำค่าวนี้                       พี่ตั้งใจ๋หมาย                ไจ้เพียงบรรยาย            ว่าไปอย่างอั้น

กลั่นมาจากใจ๋              ทรวงในพี่หั้น              เป๋นเรื่องสำคัญ            แต๊ตั๊ก

พี่จักบ่จ๋า                      ถ้าพี่บ่ฮัก                      พี่จักบ่ตั๊ก                     นอนาย

 

ค่าวตี้เขียนไว้               ใส่ในจดหมาย              บ่เกยบรรยาย               กับไผอื่นผู้

ไจ้เพียงกำจ๋า                มาจุล่ายอู้                     เนอสายพธู                   นาฏน้อง

ฮักเต๋มหัวใจ๋                ทรวงในฮ่ำฮ้อง            เสียงมันดังก้อง             ตางใน

น้องคงจะฮู้                  อยู่ในหัวใจ๋                  ว่าพี่ฮักนาย                  บ่ไจ้อู้เหล้น

ไจ้จุหลอกกั๋น              หื้อมันตื่นเต้น              เป๋นก๋รรมเป๋นเวร         อย่างนั้น

และในหัวใจ๋                ของนายน้องจั๊น           ก่อฮักพี่หั้น                  นอนาย

น้องบอกวันนั้น           มั่นในใจ๋หมาย             พี่อ่านบรรยาย              ในมือถือหั้น

พี่ก่อดีใจ๋                      ตี้นายน้องหนั้น            ฟู่กำสำคัญ                   อย่างนี้

บ่อยากไปไหน             หื้อไกล๋ลีกลี้                 อยากมาอยู่หนี้              ตวยนาง

เรื่องเก่าเฮานั้น             ตี้มันหมองหมาง          เหมือนเหยื้อบางๆ        มาขวางกีดกั้น

จุ่งลืมมันเหีย                ทิ้งเสียตี้หั้น                  อยากขอหื้อมัน             ผ่านป๊น

 

น้ำในต๋า                       ไหลมาเอ่อล้น              จ๋นใจ๋จะอู้                    นอนาย

อยากฟู่กับน้อง             แต่ต้องใจ๋หาย              กี่เตื้อก่อดาย                 โทรไปหาเจ้า

บ่ได้ยินเสียง                 สำเนียงน้องเหน้า         พี่หมองซึมเซา             ใจ๋ล้ำ

ง่อมในหัวใจ๋                ทรวงในหม่นจ๊ำ           อดฝืนกลืนกล้ำ            ดวงทัย

ถ้าพี่ขาดน้อง               คงต้องขาดใจ๋              ถ้าน้องจากไป              คงไห้นั่งเศร้า

 

ค่อยฟังเต๊อะหนา         โนจาน้องเจ้า               เรื่องฮักของเฮา             กล่าวจี๊

อย่าลาจากไกล๋             อย่าไปหลีกลี้               จุ่งอยู่ตี้หนี้                    นอนาย

มาสานต่อฮัก               สมัครใจ๋หมาย              ฮักของคำจาย              กับนายนาฏเจ้า

เรื่องอื่นนั้นหนา           บ่จ๋าหื้อเศร้า                 เรื่องก่อนนานเนา         เก่านั้น

ลืมมันเต๊อะหนา           โนจาน้องจั๊น               หาสาระหั้น                  บ่มี

พี่เข้าใจ๋แล้ว                 แม่แก้วใสสี                  ว่าน้องคนดี                 มีใจ๋ฮักหมั้น

บ่ได้มีไผ                      คนใดอื่นหั้น                เหมือนพี่สำคัญ            แต่งคิด

ขอยกหัวใจ๋                  ไว้คู่จีวิต                      อุทิศหื้อเจ้า                   คนงาม

 

จะฮักน้องนี้                 แม่บัวจี๋หลาม               หื้อโลกลือนาม            กำฮักแห่งข้า

พี่ฟู่จากใจ๋                    เนอนายน้องหล้า          ไจ้แค่เขียนมา               อย่างนั้น

ว่ามาจากใจ๋                 เนอนายน้องจั๊น            ไจ้ฟู่อย่างอั้น                บ่ดาย

ค่าวตี้เขียนไว้               ใส่ในจดหมาย              หวังจักบรรยาย           หื้อนายนาฏเจ้า

ถ้าน้องนั้นหนา             เปิดมาอ่านเข้า              คงหันใจ๋เฮา                 สักน้อย

หวังน้องฮับสาย           หื้อจายจื้นจ๊อย              ยินเสียงสาวหน้อย        คนดี

ยกโทษสักครั้ง             อย่าฟั่งหมองศรี            ขออย่าได้มี                  เรื่องตี้ขุ่นข้อง

 

ค่าวจ๋าไข                     จากใจ๋สี่ห้อง                หื้อน้องนั่ง                   อ่านกำ

หลอนพี่ทำ                   หื้อจ๊ำโศกต้อง              ขอน้องหื้ออภัยจิ่มแลนายเหยฯ

 

 

 

เดอะจิ๊กุ่ง

10/8/2552   1.50 น.

 

---------------------------------------------------------

โครงก๋ารเผยแพร่ค่าวในรูปแบบซีดี

http://www.teeneelanna.com/moojoomhao/home/space.php?uid=1&do=blog&id=236

แชร์ 2928 ดู | 0 ความเห็น

Footprints

ความเห็น