![[[ ที่นี่ล้านนาดอทคอม ]]](image/logo.gif){kind=logo}
โครงก๋ารเผยแพร่ค่าวในรูปแบบซีดี
2009-12-29 01:41| |
โครงก๋ารเผยแพร่ค่าวในรูปแบบเสียงบันทึกลงซีดี
โดย.... ที่นี่ล้านนาดอทคอม
เพื่อนๆ ครับ ผมมีโครงก๋ารส่วนตั๋วตี้จะทำ "ซีดีค่าว" แบบล้านนามาเผยแพร่หื้อกับคนรุ่นใหม่
และคนทั่วไปได้เอาไปฟังกั๋นเน่อครับ มีวัตถุประสงค์ตี้สำคัญคือ
1. เพื่อเผยแพร่ค่าวหื้อเป๋นตี้ฮู้จัก
2. เพื่อประชาสัมพันธ์เว็บไซต์
3. เพื่อรวบรวมรายได้สนับสนุนกิจก๋รรมของชมรมคนรักค่าว
4. เพื่อรวบรวมรายได้สมทบทุนโครงการ "จุดเทียนทางปัญญา หาตำราให้น้อง"
http://www.teeneelanna.com/moojoomhao/home/space.php?uid=1&do=blog&id=252
(รายได้จากการขายซีดี 1 แผ่น
5 บาท สนับสนุนชมรมคนรักค่าว
อีก 5 บาท สมทบทุนโครงการ "จุดเทียนทางปัญญา หาตำราให้น้อง"
ที่เหลือนำไปใช้เป็นทุนหมุนเวียน เพื่อจัดทำซีดีเผยแพร่ต่อไปครับ )
เนื้อหาของค่าวในซีดีแผ่นแรกเป๋นแนวความฮักครับ
ตั้งชื่อว่า "ค่าวฮ่ำกำฮัก" ลองฟังตั๋วอย่างค่าวได้จากที่นี่ครับ
(ตี้ฟังนี้เป๋นแค่ตั๋วอย่างเน่อครับ อิอิ ตั๋วแต๊ต้องลองไปฟังในซีดี)
ซีดีค่าวนี้หมู่เฮาจะลองแป๋งกั๋นเองก่อน แบบง่ายๆ ครับ ต้นทุนประมาณแผ่นละ 15 บาท
ก่อเลยอยากจะประชาสัมพันธ์หื้อเพื่อนๆ กุ๊คนตี้สนใจ๋อยากจะฮ่วมเผยแพร่ค่าวตวยกั๋น
เผื่อว่าจะมีท่านใดสนใจ๋เอาไปแจกหื้อเพื่อนฝูงหรือคนฮู้จักเนื่องในโอกาสพิเศษต่างๆ
เช่นแจกเป๋นของตี้ระลึกในงานแต่งงาน แจกในงานวัด งานศพ งานขึ้นบ้านใหม่
หรือเป๋นของขวัญเนื่องในโอกาสส่งท้ายปี๋เก่าต้อนฮับปี๋ใหม่ ฯลฯ
สามารถติดต่อได้เน่อครับ ทีมงานที่นี่ล้านนาเฮายินดีตี้จะทำหื้อเป๋นก๋ารเฉพาะในแต่ละงานครับ
เรื่องราคาซีดีขายเพียงแค่แผ่นละ 25 บาท เน่อครับ
แต่ถ้าซื้อ 4 แผ่น 100 บาท แถมหื้อ 1 แผ่นครับ
รวมเป๋น 5 แผ่น ในราคา 100 บาทครับ
ส่วนค่าจัดส่งตางไปรษณีย์ต๋ามจิตศรัทธาครับ
สั่งซื้อได้ตั้งแต่บะเด่วนี้เป๋นต้นไปครับ อิอิ
ส่วนไผอยู่เจียงใหม่จะไปซื้อตี้ร้านบานเย็น เชียงใหม่
ถนนคนเดินวัวลาย (วันเสาร์) ก่อได้เน่อครับ หมู่เฮาจะไปเล่นดนตรีกั๋นตี้หั้นครับ
เดอะจิ๊กุ่ง
(083-2018849)
------------------------------------------------------------
หมายเหตุ : เลขบัญชีสำหรับโอนเงินค่าแผ่นซีดีค่าว
ธนาคารไทยพาณิชย์ จำกัด (มหาชน)
สาขาคณะแพทยศาสตร์เชียงใหม่
ชื่อบัญชี : นายมงคล ชัยวุฒิ
บัญชีออมทรัพย์
เลขที่บัญชี : 566-459349-5
15 /4/2551
ลิขิตกล๋อนจ๋า บ่ลาหลีกลี้ ส่งมาตี้หนี้ จากสี่ห้องใจ๋
ฝากลมฝากฟ้า ดาราดวงใส ฝากเมฆลอยไป ไกล๋เถิงบ้านเจ้า
พี่กึ๊ดเติงหา แต๊นาน้องเหน้า พี่หลงพี่เมา ใจ๋แต๊
หักห้ามใจ๋ เอาไว้บ่แป๊ เกิ๋นจักจะแก้ ใจ๋เฮย
ฮักน้องแล้ว แก้วต๋าพี่เหย ฮักแต๊ๆ เลย อยากเผยบอกเจ้า
ฮักแต๊ๆ หนา แต๊นาน้องเหน้า แม่จี๋นงเลา สาวน้อย
บ่ขอฮักไผ หื้อใจ๋ต่ำก๊อย จะฮักสาวหน้อย นางเดียว
คนอื่นนอกนี้ พี่บ่แลเหลียว บ่ก๋ายบ่เตียว บ่เกี่ยวบ่ข้อง
อยากจักฟู่จ๋า สบต๋านั่งจ้อง มาหมายมาจอง น้องจั๊น
อยากหอมแก้มสาว นงเยาว์แต๊นั้น สมัครฮักมั่น สัญญา
อยากกอดน้องไว้ ในแขนพี่หนา แล้วฟู่บอกมา ว่าพี่ฮักเจ้า
อยากจวนขวัญต๋า โนจาน้องเหน้า มาจ้วยนับดาว บนฟ้า
16/4/2551
นอนหนุนตักสาว ยามเฮาอ่อนล้า นอนห่มฮ่วมผ้า เตียงเดียว
พี่ฮักน้องแล้ว แอวกลมกล๋มเกลี๋ยว ใช่จุหยอกเคียว หื้อเสียวใจ๋เหล้น
บ่ใช่จุสาว หื้อเมาตื่นเต้น เป๋นก๋รรมเป๋นเวร เต้านั้น
ฮักแต๊ๆ หนา โนจาน้องจั๊น ใจ๋พี่ฮักมั่น สัญญา
ฝากค่าวนี้ไว้ ในโลกโลก๋า เป๋นจดหมายมา ฟู่จ๋าบอกเจ้า
ถ้าน้องบ่สน คงหม่นใจ๋เศร้า คงหมองคงเซา ใจ๋แต๊
พี่ข่มหัวใจ๋ เอาไว้บ่แป๊ ยากเกิ๋นจะแก้ นอนาย
ถ้าฮักพี่นี้ บ่มีความหมาย ใจ๋พี่คงวาย เสียหายบ่หน้อย
ถ้าน้องบ่สน จังคนต่ำต้อย คนป่าคนดอย ยากไร้
ใจ๋พี่คงหมอง น้ำนองเนตรไซร้ บ่มีหว่างได้ คืนดี
ฮักพี่สักน้อย แม่พลอยใสสี ฮักพี่สักที อย่าหนีจากอ้าย
มาจ้วยเติมเต๋ม เหมือนเข็มคู่ด้าย เหมือนพี่คู่นาย นาฏน้อง
เหมือนเครื่องนนถี ดนตรีป้าดก๊อง คู่กับเสียงก้อง กั๋งวาล
เหมือนกับพี่นี้ ตี้คู่ต๋าหวาน เหมือนถ้วยกับจาน อาหารกับหม้อ
ฮักพี่เต๊อะหนา จั๋นตาดอกอ้อ แม่นวลลออ สาวน้อย
อยากจักมาหา มาจ๋าจื้นจ๊อย ฟู่กับสาวหน้อย ตึงวัน
จิตใจ๋อ่อนล้า ได้ก้ากึ๊ดฝัน มันง่อมมันงัน อยากหันหน้าเจ้า
จึ่งเขียนกำจ๋า มาหาน้องเหน้า เป๋นกล๋อนกำเมา ค่าวไจ๊
ส่งมาหื้อตั๋ว บัวคำน้องไท้ อ่านยามง่อมได้ นอนาง
ฮักของพี่นี้ บ่มีวันจ๋าง บ่ล่อลวงพลาง หื้อหมางหม่นเศร้า
ขอยั้งก่อนหนา โนจาน้องเจ้า กับกล๋อนกำเมา ค่าวนี้
เดิ้กแล้วหนา ต้องลาหลีกลี้ ยั้งก่อนเต้าอี้ นอนาย
สารบรรยาย บ่สุดเสี้ยงถ้อย ก้อยบอกน้องต่อวันลูน ก่อนแลนายเหยฯ
"ดุ่งจิ๊เกอะ"
---------------------------------------------------------
ความเห็น
เอาม่วนว่าครับ อิอิ
เอาม่วนว่าครับ อิอิ
จะเร่งทำหื้อเสร็จครับ จะได้เอามาเผยแพร่
จะเร่งทำหื้อเสร็จครับ จะได้เอามาเผยแพร่
แตงกิ๊วววว
...หนานเอ๋
ต๋ามสบายครับปี้หนาน อิอิ
ยังบ่ได้วางขายตี้ไหนครับ
ตั้งใจ๋ว่าจะเอาไปขายถนนคนเดินวัวลายครับ (หน้าร้านบานเย็น)
เรื่องราคาปรับนิดหน่อยเน่อครับ
ขายแผ่นละ 25 บาท
แต่ถ้าซื้อ 4 แผ่น 100 บาท แถมหื้อ 1 แผ่นครับ
รวมเป๋น 5 แผ่น ในราคา 100 บาทครับ
อยากได้กี่แผ่นแจ้งมาได้เลยเน่อครับ
อุดหนุนสักแผ่นก่อ
เสาร์หน้าวางแผงที่หน้าร้านบานเย็นครับท่าน อิอิ
อยากได้กี่แผ่นแจ้งมาได้เลยเน่อครับ
เสียงบ่ค่อยดีตวย อิอิ
เอาไว้ว่างๆ จะเซาะคนว่าเป๋นทำนองมาบันทึกเสียงครับ