เข้าระบบ

ชื่อผู้ใช้

รหัสผ่าน

  ล ง ท ะ เ บี ย น  

thejeekung

thejeekung的บล๊อก

thejeekung的主頁 | ดูทั้งหมด

ค่าวฮ่ำกำฮัก 2

2009-08-19 22:05
 
 
 
 
ค่าวฮ่ำกำฮัก 2

12/7/2552


กลอนวาตา ไขจ๋าบอกจี๊ จากใจ๋ม่อนหนี้ ตี้มันเสียหาย
จักขอเล่าไว้ ใส่ในจดหมาย หวังแค่ระบาย หื้อหายอัดอั้น
มีเรื่องหนักใจ๋ ดวงทัยเกิ๋นกลั้น ขอระบายมัน อย่างนี้

กล๋อนกำจ๋า บ่ลาหลีกลี้ เรื่องมันอย่างอี้ นอนาย
นึ่งคือคนฮัก สมัครหมั้นหมาย หมดเสี้ยงใจ๋จาย หื้อนายน้องเจ้า
แหมนึ่งคนหนา ว่าไปก่อเศร้า เป๋นอ้ายของเฮา บ่าวจั๊น
ตุ๊กข์ในหัวใจ๋ ดวงทัยอย่างนั้น มันอัดมันอั้น เกิ๋นทน
ใจ๋ข้าม่อนนี้ มีแต่สับสน มันมืดหมองมน หม่นในใจ๋เศร้า

ก่อนเกยฮักกั๋น สัมพันธ์ใฝ่เฝ้า มีแค่สองเฮา เต้านั้น
แต่วันนี้หนา โนจาน้องจั๊น มีเขาอยู่หั้น แหมคน
ฮักของเฮานั้น มันเลยสับสน เจ็บเกิ๋นจะทน อับจ๋นใจ๋เศร้า
กำฮักนั้นหนา เกยจ๋าบอกเจ้า แม่จี๋นงเลา หลายครั้ง
ฮักมันไปไกล๋ เกิ๋นใจ๋จักยั้ง สติบ่ตั้ง ดวงทัย

ถ้าน้องบ่ฮัก คงจักขาดใจ๋ ถ้าน้องจะไป อ้ายคงหม่นเศร้า
ตุ๊กข์ใจ๋แต๊หนา โนจาน้องเจ้า ไจ้แป๋งกำเอา ล่ายลี้
ถ้าน้องชอบเขา ลืมเฮาม่อนนี้ ใจ๋คงป่นปี้ เปปัง
ฮักของพี่นี้ บ่มีความหวัง เพราะว่าน้องจัง บ่หวังใฝ่เฝ้า
บ่อยากขัดขืน มาฝืนใจ๋เจ้า สหรี๋นงเลา นาฎน้อง

กึ๊ดจะฮักไผ ต๋ามใจ๋เรียกร้อง ขอนางบ่ต้อง กั๋งวล
พี่คนยากไร้ หัวใจ๋อับจ๋น ขอลาหน้ามน สู่หนตางเศร้า
ถ้าในหัวใจ๋ ขอนายน้องเจ้า ตัดสินใจ๋เอา บ่าวนั้น
ตั๋วพี่นี้หนา ขอลาน้องจั๊น จักบ่ขวางกั้น นอนาย
ขอหอบใจ๋นี้ ตี้มันเสียหาย ย่างต๋ามดินทราย ไปต๋ายดาบหน้า

แต่ถ้าในใจ๋ ของนายน้องหล้า บ่สมวาตา อย่างนั้น
ยังมีหัวใจ๋ หื้อจายพี่จั๊น สมัครฮักมั่น สัญญา
จ้วยจ๋าบอกย้ำ สักกำเต๊อะหนา บอกเขาอย่ามา ฟู่จ๋าจีบเจ้า
ถ้าในหัวใจ๋ ของนายน้องเหน้า ยังฮักตั๋วเฮา ม่อนนี้
บอกเขาหน่อยหนา หื้อลาหลีกลี้ อย่ามาจู้จี้ ขวางตาง

ถ้าพี่บ่ฮัก พี่จักบ่ขาง ย้อนว่าฮักนาง ปล่อยวางบ่ได้
ถ้าเขามาหา มาจ๋าใกล้ๆ พี่อยากไล่ไป หื้อป๊น
น้ำในต๋า ไหลมาเหลือล้น จ๋นใจ๋จะอู้ นอนาย
นึ่งก่อคนฮัก สมัครใจ๋หมาย นึ่งก่อพี่จาย บ่ไจ้อื่นผู้
พี่มาก่อนเขา สองเฮาฟู่อู้ น้องจุ่งกึ๊ดดู สักครั้ง

น้ำในต๋า ไหลมาบ่ยั้ง ใจ๋พี่บ่ตั้ง นอนาย
สารบรรยาย บ่สุดเสี้ยงถ้อย ก้อยมาเล่าต่อวันลูน ก่อนแลนายเหย
 
 
 
เดอะจิ๊กุ่ง
 
 

---------------------------------------------------------

โครงก๋ารเผยแพร่ค่าวในรูปแบบซีดี

http://www.teeneelanna.com/moojoomhao/home/space.php?uid=1&do=blog&id=236

แชร์ 3042 ดู | 4 ความเห็น

Footprints

ความเห็น

  • doraemonmilk
    555+

    ช่ายเลย ถ้าไม่รักก็ไม่หวง
  • thejeekung
    doraemonmilk: 555+

    ช่ายเลย ถ้าไม่รักก็ไม่หวง
    อ่านปอจะฮู้เรื่องก่อครับ กำเมือง
  • doraemonmilk
    ยังไม่ได้อ่านเลยคะ ดูแต่รูปกะหัวข้อ
  • thejeekung
    doraemonmilk: ยังไม่ได้อ่านเลยคะ ดูแต่รูปกะหัวข้อ
    ลองอ่านดูครับ เขียนจากเรื่องจริง